يوميات فى السيرك - اليوم الثامن - عز طفل يتحدي دولة العواجيز

عز هو ابن اخت كابتن روما اليماني ‘ والدة عز كانت في طفولتها بطلة في السيرك و بتقدم فقرة المشي علي السيلك و لكن حاليا هي زوجه و ام اما عز فهو طفل نشأ في جو فني في السيرك و طبعا كابتن روما لاحظ موهبته من سن ست سنين فقرر تدريب عز علي لعبة الارجل و فعلا عز حبها و اتقنها ، أول يوم ليهم كان في الغردقة بعديها عز لعبها في كل العروض و زار بلاد كتير مع كابتن روما لغاية ما وصل سن 10 سنين حاليا و كابتن روما بيقول عز نسخة مني بشوف فيه نفسي لانها نفس طفولتي و بدايتي فى نفس اللعبة بالسيرك القومى فى صغرى .

اما عن يوم السيرك انهاردة فكان يوم مفتقد لأهم أبطال السيرك و هو كابتن محمد اليماني و محمد بيشارك مجدي في اغلب الالعاب ولكن محمد عنده امتحان في المعهد العالي للفنون المسرحية فسافر القاهرة و طبعا بدأ العرض بلعبة الاطباق و نجح مجدي طبعا انه يشيل الفقرة من غير اي مشاكل و من غير ما يشعر الجمهور بشئ و لكن كان فى فقرات ثانية لازمها بطلين و هنا كان منقذ الفريق عز الطفل الصغير و قدر فعلا يظهر نجم كبير و بطل فى أكثر من فقرة و موقف .

الفقرة الأولى لعز

المفروض انها كانت موقف تمثيلي كوميدي بين محمد و مجدي فقرة فيها الاثنين بيختلفوا علي كرسي واحد و كل واحد عايزه لنفسه و اثناء الفقرة بيضربوا بعض بالاقلام لكن الجمهور فوجئ ان البطل امام كابتن مجدى هو الطفل عز و يكون عز هو نجم الفقرة فيضحك الجمهور من اداء كابتن مجدي لانه بيظهر بيجري من عز أما عز بيضرب مجدي بالقلم بصوت عالي جدا و ده فعلا ضحك الجمهور اكثر من ان البطلين يكونوا كبار وظهرت هنا بطولة و فن عز

الفقرة الثانية لعز

 كانت فقرة الارجل و دي اللعبة الاصلية لعز و الجمهور اعتاد علي عز بيلعبها مع كابتن روما و هى فقرتة الاساسية و الجمهور معتاد عليه فيها .

 https://www.youtube.com/watch?v=0HMgi90a0S8

عز مذيع و مقدم فقرات

ولكن حصل موقف مفاجئ اثناء العرض انه كابتن روما استقبل مكالمة من أصدقائه من خارج صالة العرض و كان وقتها بيقدم الفقرات كإذاعة داخلية فسلم المايك لعز و خرج و قام عز بالمهمة بأسلوب أمتع الجمهور جدا و للمرة الثانية تظهر بطولة عز فى انه يسد غياب عضو من فريق العمل و ينجح اليوم من غير ما يشعر الجمهور بشئ او غياب عضو من اعضاء الفريق .

دولة العواجيز

طبعا كلنا عارفين دولة العواجيز مش مهم اسمها ايه ولا هي فين علي الخريطة لكن المهم انه الدولة دي علشان تتولي فيها منصب قيادى لو كنت مجتهد جدا  ممكن توصل للمنصب قبل الستين بسنه او ثنين و لما تتولي منصب قيادي كبير قوي في الدولة وزير مثلا لو الريح طيب بعد الستين بعشر سنين و لو كنت عندك قدرات فذه و جبارة ممكن علي الستين طبعا المبررات موجودة انه في تدرج وظيفي و انه الشباب لا يملك خبرة و ان السلم لازم تطلعه واحدة واحدة كله كلام جميل ما اقدرش اقول حاجة عنه ولكن في السيرك مفيش الكلام  ده في السيرك ممكن اصغر ما فينا يقودنا و يبقي بطلنا و يشيل السيرك و ننجح معاه و به 

الفكر ده مش غريب علي مجتمعنا الاسلامي لان سيدنا أسامه بن زيد أصغر قائد للجيش الإسلامي المتوجه للشام لمواجهة الروم سنة 11 هجرى  في عهد رسول الله صلى الله عليه و سلم
كان عمره 18 سنة و حمل راية الاسلام في الحرب و تولي قيادة الجيش و قاد المسلمين الى النصر على اقوى جيش فى العالم فى الوقت ده .

قصة ثانية شهيرة جدا لسيدنا عمر بن الخطاب مع طفل فى يوم مر علي مجموعة من الاطفال ففرو من امامه لهيبة سيدنا عمر الا طفل واحد وقف ثابت مكانه و لما سأله سيدنا عمر لماذا لم تفر معهم ؟ فقال يا امير المؤمنين لم افعل ما اخشاه لكى افر من امامك

هما دول اطفال زمان كانوا ابطال نشرو الاسلام و جعلوا الحضارة الاسلامية تملئ الافاق و عز هو نموذج لطفل عربي مصري مفروض يكون موجود لكنه اختفي  للاسف لان قدره انه يتولد في دولة العواجيز .

أكثر كاريكتير على الانترنت معبر عن دولة العواجيز كان لراجل عجوز جدا زى ما هو واضح و ماشى على طريق مفروش بالورود و مكتوب عليه الورد اللى فتح .... فهل من سبيل للتغيير ؟

يوميات فى السيرك - اليوم السابع - أنا و كابتن مجدى و الفيسبوك

كابتن مجدى هو ابن اخو كابتن روما شاب جامعى مثقف جدا و مهذب جدا جدا زى باقى فريق السيرك فى الحياة الطبيعية اميل للجدية بمعنى انه بعيد عن التهريج و مش هيحاول يعمل حركة يضحكك بيها زى ما الناس العادية ممكن تهرج فى حوارها وصوتها يعلا بالضحك لان ضحكته ابتسامه خفيفة و طبعا لما بتتعرف على أصدقاء جداد لازم نضيفهم لقائمة أصدقائنا و الا ما نبقاش أصحاب بما ان كابتن مجدى اصبح من اهم اصدقائى علشان كده فى اليوم ده نزلت للسيرك و أنا ناوية أعمل اضافة لكابتن مجدى اليمانى و لازم أخليه يقبل الاضافة و طبعا عملت حسابى و أخدت معايا اللاب  متضبط على موقع الفيسبوك عدل يعنى لا مفر هضيفه هضيفه.

طبعا كلنا و أى إنسان طبيعى فى عصرنا أول شئ يفكر فيه اول ما يفتح عنيه الفيسبوك و أخر شئ يشوفه قبل ما ينام الفيسبوك علشان كده تعاملت مع كابتن مجدى و كابتن روما على انهم ناس عاديين و طبيعيين زينا كده و لكن كانت المفاجئة المذهلة !!!!

أول ما وصلت السيرك قابلت مجدى و قلتله على فكره أنا عملتلك اضافة ممكن تعملى قبول ؟

 

و لكن الغريبة أنه مجدى قال أنى موجودة فعلا عنده على صفحته و انه عارف الاكونت بتاعى و طبعا لانى ما شفتش الاكونت بتاعة فى الاصدقاء و لا شفت بوستاته أكدت لمجدى انه مش عندى و لكن مجدى قالى اقولك أمارة صورة البروفيل لونها احمر تمام ، فعلا عارف الصورة و عارف الاسم ولكن بردوا هو مش عندى و انا أصريت قصاد اصراره اننا نفتح الانترنت لانى بتعامل معاه على أنه انسان عادى و طبيعى زينا ما اعرفش الحقيقة و لكن حصل الموقف ده ....

أنا : شوف انا جبت اللاب و أدى كابل النت نوصله باللاب انا اعمل اضافة انت تعمل قبول سهلة خالص دى

مجدى : فيسبوك هنا !!! و فى السيرك معاد العرض قرب و بعدين كابتن روما لو شافنا هيعمل مشكلة كبيرة جدا

أنا : ده ثوانى مش هيلحق خالص

مجدى : صدقينى انتى عندى على الفيس اصلا

انا : طيب خلاص البكا على رأس الاكونت افتح بقا

و فجأة وصل جنرال روما و شافنا قدام اللاب و كأنه حصلت كارثة

كابتن روما : ايه اللى بتعمله ده يا كابتن

مجدى : دة ال .... ال .... حتى الكلمة مش عايزة تطلع ............. ده الفيسبوك يا كابتن

كابتن روما : و الفيسبوك بوك بيعمل ايه فى السيرك

مجدى : ما هو ده اللى قلته والله يا كابتن بس هما كانو دقايق و هنقفل على طول ... انتى عاجبك كده ؟؟؟

كابتن روما : انت مش أخدت ساعتين النت بتوعك من 1 لغاية 3 صباحا قبل ما تنام ايه عايز تدمنلى الفيسبوك

أنا : لا لا لا يا كابتن ما تقلقش من الحكاية دى خالص فى مصحات فى الصين بتعالج ادمان النت

كابتن روما : هو انا لسه هستناه لما يروح الصين يتعالج و يرجعلى و العرض قدامه 10 دقايق ده ما بقاش سيرك اليمانى ده بقا كوفى نت اليمانى فين كابل الانترنت انا هفصله .

و فعلا راح كابتن روما فصل كابل الانترنت و لكن محمد اليمانى ابن كابتن روما حاول يهدى الموقف و يقوله خلاص يا كابتن سامح مجدى يا كابتن طيب علشان خاطرى يا كابتن و لكن كابتن روما اصر انه يفصل الكابل و انه مجدى غلط

ولكن انا ما كنتش فاهمه هو كابتن روما زعلان قوى كده ليه و ايه موضوع الساعتين دول يعملوا ايه دول طيب ولان مجدى عزيز عليا ولانى اتسببت فى زعله قلت اتدخل و اصلح الموقف .

أنا : كابتن روما حضرتك ليه زعلان من مجدى على فكره انا السبب لانه كان رافض فعلا

كابتن روما : انا مش زعلان من مجدى انا خايف على مجدى و لما افصل النت احسن لما يقع تكسر رقبته

أنا : معقول ليه ؟

كابتن روما : لان مجدى دلوقتى مفروض انه هيلعب السلم المتحرك عارفه يعنى ايه يعنى لازم يكون متحكم فى اعصابه و فى كل عضلة فى جسمه و لو أختل توازنة هيقع و طبعا انا محدد لكل واحد ساعتين بس فى اليوم للانترنت لانه اللى بيقضوا اوقات طويلة على النت بيسحب نظرهم و بيحصلهم مشاكل فى الرقبة و الفقرات بتتعب و بعد كده يحصلة عدم توازن وممكن جدا يقع و تبقى كارثه

أنا : لا لا لا مفيش الكلام ده خالص خالص عندك أنا مثلا بشتغل على الكومبيوتر من اكثر من 18 سنة و بقضى اكثر من 15 ساعة فى اليوم و ما حصليش اى حاجة خالص دى اشاعات يا كابتن

كابتن روما : ما عندكيش اى مشاكل خالص !!!!!

أنا : خالص

كابتن روما : خالص !!!!! طيب خلاص هنبدأ العرض

أنا : كابتن كابتن ما الاقيش معاك مسكن قبل ما تبدأ العرض

كابتن روما : هنا و فى السيرك هى صيدلية ... ليه مالك ؟؟؟؟

أنا : رقبتى بتوجعنى قوى قوى يا كابتن

كابتن روما : خالص !!!!!

مجدى : ايه اللى بتعمليه ده مره تقلبيها كوفى نت و مره مستشفى العرض خلاص بدا

أنا : روحو اعرضوا و انا بقا هطلع الموبايل و عليه فيسبوك على فكره و مش عايزه الكابل بتاعكم

و فجأ قبل ما كابتن مجدى يخرج من ورا الستارة للعرض لمح صفحة الفيس على موبايلى فجأة خطف من ايدى الموبايل و قالى ايه ده ؟ قلتله موبايل يا كابتن ، و ايه اللى عليه ؟ قلتله فيسبوك يا كابتن ، قالى و مين الاكونت ده ؟ قلتله انا فيجو اليمانى يا كابتن قالى ما هو انا فيجو اليمااااااااااااااااااااااانى

أنا : ايه ده ازاى ما اخدتش بالى من الاسم ؟ و لا من الصور كمان ؟ هو فعلا عندى يا دى الكسوف

ايه الناس دى و ايه الانضباط ده كل شئ ماشى بنظام و بمواعيد بصراحة بصراحة حياتهم صعبة قوى قوى يا خااااال

 

إدمان التكنولوجيا و اسطورة بيجماليون

المفروض أن الانسان هو اللى اخترع التكنولوجيا بما فيها الانترنت و الفيسبوك و المفروض انه الانسان هو المتحكم فيها ولكن مع الوقت حصل العكس اصبح الانسان مدمن للتكنولوجيا و لما ادمنها تحكمت هى فيه و اصبح مملوك لها و هو ده بالضبط اللى حصل فى اسطورة بيجماليون اللى نحت تمثال فينوس الملقب بإلهة الجمال علشان يكسر به غرور النساء الجميلات فى المدينة و فعلا نحت تمثال غاية فى الجمال لدرجة انه اصبح بيقضى كل وقته فى مشاهدة جمال التمثل و بعدها وقع فى غرام التمثال و اصبح اسير للتمثال

أبطال السيرك هنا بيروضوا كل شئ ثعابين و وحوش و نار  حتى الجاذبية الارضية و قبل كل ده روضوا عقولهم و اجسادهم و اعصابهم علشان كده ما كانش صعب عليهم ترويض التكنولوجيا كمان بانهم يتحكموا فى نفسهم و تكون وسيلة للتواصل مش مادة للادمان .

ابطال السيرك و ادمان المخدرات

اذا كان كابتن روما واسرته تغلبوا على ادمان الانترنت كان لازم اسأله عن الادمان التقليدى بكل صراحة عن شرب الكحول و الحشيش و البانجو و السجاير الملفوفة و غيره و لكن كابتن روما سكت دقيقة وقالى قى كثير بيعملوا ده لكن مع الاسف اللى بيعمل كده بيقع اما هيفقد توازنه فى العاب التوازن او هيفقد هيبته قدام الحيوان و لو فقد هيبته وقتها الحيوان يفترسة يعنى باختصار هتكون حياته هى الثمن .

الانسان أقوى مخلوقات الله

كابتن مجدى و كابتن روما و ابطال السيرك نموذج بيثبت ان الانسان فعلا هو أقوى ما خلق الله على الارض و كل شئ ربنا خلقه مسخر للانسان و الانسان قادر على تسخير كل شئ بالارادة و العقل اللى ربنا ميزه به عن كل المخلوقات

بالعقل الانسان روض الوحوش و تحكم فى النار و فى قوانين الطبيعة و تحكم فى قدراته و تحدى ذاته فمش هيكون صعب عليه التحكم فى التكنولوجيا

فعلا السيرك مدرسة كبيرة جداً للى عايز يتعلم و لو السيرك هيخرج جيل خلوق منضبط ذكى واعى ارجوكم اعملو فى كل مدرسة و فى كل شارع سيرك يعلم الولاد يمكن نلاقى اجيال مختلفة .

مفاجئة للقارئ

عزيزى القارئ طبعاً حضرتك قريت قصة الحوار اللى دار بينى و بين كابتن مجدى و كابتن روما و شفت الصور بنفسك احب اقولك انه كل الحوار ده ما حصلش رغم الصور و هى قصة من وحى الخيال لان ببساطة كابتن مجدى ملتزم بساعتين الانترنت و انا لا يمكن هخليه يكسر اوامر كابتن روما و اخليه فى موقف محرج و ده درس تانى يعلمنا انه كثير من الاخبار الموجوده على الانترنت و الفيسبوك للاسف مغلوطة رغم الصور المقترنة بالخبر بتطلع تلفيق و كذب و تشهيير حبينا بس نثبتلكم ده بالبرهان و الدليل العملى ، و يا رب نلاقى شبابنا فى يوم زى الشباب دى و يا رب نلاقى بلدنا فى يوم تتغير للافضل .